ဒီးမော့ဆို၊ ပင်လယ်ကွေ့က စစ်ရှောင်များ မြေမြှုပ်မိုင်းများကြောင့် နေရပ်မပြန်ရဲ

ကရင်နီ(ကယား)ပြည်နယ်၊ ဒီးမော့ဆိုမြို့နယ် အနောက်ဘက်ခြမ်း ပင်လယ်ကွေ့ စစ်ရှောင်စခန်းက ပြည်သူတွေဟာ စစ်ရှောင်ကာလ ၂ နှစ်ကျော်ကြာပြီဖြစ်လို့ နေရပ်ပြန်ချင်ပေမဲ့ မြေမြှုပ်မိုင်းတွေကြောင့် မပြန်ရဲသေးဘူးလို့ စစ်ဘေးရှောင်တွေဆီက သိရပါတယ်။

အဲဒီစခန်းမှာ တနန်းဦးကွိုင်ကျေးရွာက အိမ်​ထောင်စု ၁၇ စု၊ လူဦးရေ ၈၀ လောက်ဟာ ၂၀၂၁ ခုနှစ် ၅ လပိုင်းကစလို့ စစ်ဘေးရှောင်ခိုလှုံနေရတာလို့ ဆိုပါတယ်။

စစ်ဘေးရှောင်အမျိုးသမီးယောက်က “အိမ်ပြန်ချင်တယ်။ မပြန်ရဘူးပြောတယ်။ အရင်က ညညဆို တအားငိုတယ်။ အိမ်ကိုသတိရတာပေါ့။ ကိုယ်တယောက်တည်းမှ မဟုတ်တာ။ သူများတွေလည်း အများကြီးရှိတာပဲ။ အဲလိုပဲ ဖြေသိမ့်ရတယ်။ အရင်နှစ်တွေတုန်းက အိမ်ကို ခဏပြန်ကြည့်လို့ရပေမဲ့ အခုချိန်မှာတော့ မိုင်း​ထောင်ထားတယ်လို့ သိရတဲ့အတွက် မပြန်ရဲလို့ အိမ်တွေလည်း ပျက်စီးကုန်ပြီ” လို့ ပြောပါတယ်။

စစ်ဘေးရှောင်ပြည်သူတွေဟာ တောတောင်တွေထဲမှာ စစ်ရှောင်ရတဲ့အတွက် စီးပွားရေး လုပ်ကိုင်စားသောက်ဖို့အဆင်မပြေဘဲ တခါတရံ နေ့စားအငှားလိုက်ရတာမျိုးရှိတယ်လို့ ဆိုပါတယ်။

ကရင်နီပြည်နယ်က စစ်ဘေးရှောင်ပြည်သူတွေဟာ စစ်ရှောင်ကာလကြာလာတာနဲ့အမျှ နေထိုင်နေရတဲ့ ယာယီတဲတွေ ပျက်စီးလာတဲ့အပြင် စားသောက်‌ရေးမှာလည်း ကုန်ဈေးနှုန်းကြီးမြင့်တာ၊ လမ်းပန်းဆက်သွယ်ရေး ခက်ခဲတာတွေကြောင့် စားနပ်ရိက္ခာနဲ့ အမိုးအကာတွေ အရေးပေါ်လိုအပ်နေတယ်လို့ စစ်ဘေးရှောင်တွေဆီက သိရပါတယ်။