ကရင်နီပြည် ဘောလခဲမြို့နယ်ဘက်ကို ဦးတည်သွားနေတဲ့ စစ်ကောင်စီရဲ့ ထောက်ပို့ယာဉ်တန်း အစီး (၆၀) ခန့်ဟာ ကရင်နီဒေသခံကာကွယ်ရေးပူးပေါင်းတပ်တွေရဲ့ ကြားဖြတ်တိုက်ခိုက်မှုတွေကြားက ထောက်ပို့ယာဉ် ၃စီးဟာ အောက်တိုဘာလ ၁၈ ရက်နေ့မှာ ဘောလခဲမြို့ထဲကို ရောက်ရှိသွားတယ်လို့ ကရင်နီအမျိုးသားများကာကွယ်ရေးတပ် (KNDF) စစ်ရေးချုပ် ခူးရီးဒူက ကန္တာရဝတီတိုင်း(မ်)ကို ဖြေကြားပါတယ်။
“ လက်ရှိ စစ်ကောင်စီရဲ့ ယာဉ်တန်းတွေကတော့ သူတို့ ထွက်နိုင်အောင် ကြိုးစားနေတယ်။ မနေ့ည မှာပဲ စစ်ကောင်စီယာဉ်တန်းထဲမှာမှ ၃ စီး ဘောလခဲဖက်ရောက်သွားပြီဖြစ်တယ်။“ လို့ စစ်ရေးချုပ် ခူးရီးဒူက ပြောပါတယ်။
အဆိုပါ ထောက်ပို့ယာဉ်တန်း အစီး ၆၀ ဟာ ဘောလခဲနဲ့ ဖားဆောင်းမြို့နယ်ထဲက တပ်တွေကို လက်နက်ခဲယမ်း၊ စားနပ်ရိက္ခာ ပို့ဆောင်နိုင်ဖို့ ကြိုးစားနေတာဖြစ်ပြီး ဖရူဆိုမြို့နယ်ထဲမှာပဲ တော်လှန်ရေးတပ်ဖွဲ့တွေရဲ့ ကြားဖြတ်တိုက်ခိုက်မှုတွေကြောင့် လိုရာခရီးမရောက်နိုင်သေးဘူးလို့ မြေပြင်သတင်းအချက်အလက်တွေအရ သိရပါတယ်။
