ကိုးကန့်ဒေသရှိ စစ်ကောင်စီတပ်စခန်းတစ်ခုကို ယနေ့နံနက်တွင် ထပ်မံတိုက်ခိုက်သိမ်းပိုက်ရရှိခဲ့ကြောင်း ကိုးကန့်တပ်မတော်(MNDAA)ပြောရေးဆိုခွင့်ရှိသူ လီကျာဝင်းက အသိပေးသည်။
‘၁၀၂၇ စစ်ဆင်ရေး’ ၁၃ရက်မြောက်နေ့ဖြစ်သည့် နိုဝင်ဘာ ၈ရက် စစ်ရေးအခြေအနေကို မေးမြန်းရာ စခန်းရရှိမှုကို ပြောပြခြင်းဖြစ်သည်။
“မနက်ပိုင်းကတော့ စခန်းတစ်ခုထပ်မံ သိမ်းပိုက်ရရှိခဲ့တယ်။ ကိုးကန့်ခရိုင် တုန်းရှမ်းဒေသ မာလီလင်တပ်စခန်းပါ”ဟု MNDAA ပြောရေးဆိုခွင့်ရှိသူက ပြောသည်။
အဆိုပါတပ်စခန်းအပါအဝင် ကိုးကန့်ဒေသရှိ စစ်ကောင်စီ တပ်စခန်း ၁၂၀ကျော်ကို MNDAAနှင့် ရက္ခိုင့်တပ်တော် (AA)တို့က တိုက်ခိုက်သိမ်းပိုက်ထားသည်။
ယမန်နေ့ညနေကစပြီး လောက်ကိုင်မြို့အနီး တိုက်ပွဲဖြစ်ပွားနေကြောင်း၊ လောက်ကိုင်ဒေသ ပြန်လည်ရရှိရေး ရည်မှန်းချက်အတွက် ဆက်လက်၍ စစ်ဆင်ရေးအရှိန်မြှင့်မည်ဖြစ်ကြောင်း MNDAA အပါအဝင် ညီနောင်မဟာမိတ် ၃ဖွဲ့က ထုတ်ပြန်ထားသည်။
