မန္တလေးတိုင်း၊ မြင်းခြံမြို့နယ်အတွင်းမှာ စစ်ကောင်စီစစ်ကြောင်း တိုက်ခိုက်ခံရပြီး စစ်သား ၄ ဦး သေဆုံးခဲ့တယ်လို့ နောင်ရိုးအထူးပြောက်ကျားတပ် – NYSGF ဆီက သိရပါတယ်။
နိုဝင်ဘာ ၂၂ ရက် နေ့လယ်ပိုင်းမှာ မြင်းခြံမြို့နယ်၊ ညောင်တိုရွာကနေ တပ်ပြန်ရုပ်ပြီး အင်အား ၃၀ ဦးလောက်နဲ့ တလုပ်မြို့ထဲပြန်လာချိန် ကိုင်းကျေးရွာ တာဘောင်ပေါ်ကနေ မိုင်း ၁၀ လုံးနဲ့ စောင့်ကြို တိုက်ခိုက်ခဲ့တာလို့ ဆိုပါတယ်။
“မိုင်းဆွဲလိုက်တော့ စစ်** ၄ ကောင်လုံး နေရာမှာပဲ ပြန်ထမလာတော့ဘူး။ တုံးလုံးပက်လက် ဖြစ်ကုန်တာ” လို့ နောင်ရိုး အထူးပြောက်ကျားတပ်မှ သတင်းပြန်ကြားရေးတာဝန်ခံက ပြောပါတယ်။
သေဆုံးတဲ့အလောင်းတွေကို စစ်အုပ်စုဘက်က တလုပ်မြို့ဘက်ကို ဖောကားနဲ့ ပြန်သယ်သွားတာကို ကင်းထောက်တွေဆီက ပြန်ကြားရတယ်လို့ အထက်ပါတာဝန်ခံက ဆိုပါတယ်။
စစ်အုပ်စုက အလောင်းကိုလာသယ်ချိန်မှာလည်း အနီးဝန်းကျင်ကို သေနတ်နဲ့ ပစ်ခတ်တာတွေရှိပေမယ့် တိုက်ခိုက်ရေးရဲဘော်တွေ အန္တရာယ်ကင်းခဲ့တယ်လို့ ပြောပါတယ်။
ဒီစစ်ဆင်ရေးကို မြင်းခြံခရိုင်အမှတ် ၆ တပ်ရင်း၊ တပ်ခွဲ ၁ နောင်ရိုးအထူးပြောက်ကျားတပ် – NYSGF၊ မြင်းခြံခရိုင်အမှတ် ၂ တပ်ရင်း Taloke – PDF၊ Myin Gyan MP – 9နဲ့ ရွှေဂျိုးဖြူ မဟာမိတ်အဖွဲ့တွေ ပူးပေါင်းလုပ်ဆောင်ခဲ့တာလို့ သိရပါတယ်။
နောင်ရိုးအထူးပြောက်ကျားတပ်ဟာ ပြီးခဲ့တဲ့ နိုဝင်ဘာ ၁၆ ရက်ကလည်း မြင်းခြံမြို့နယ်၊ ရန္တပိုရွာက စစ်ကောင်စီစခန်းတခုကို မဟာမိတ်အဖွဲ့တွေနဲ့ ပူးပေါင်းပြီး ဝင်ရောက်တိုက်ခိုက်ခဲ့ပါသေးတယ်။
