မောင်တောမြို့နယ်မာ နိုဗမ်ဘာ ၂၈ ရက်နိ၊ ညဇာ ၆ နာရီကျော်ကစလို့ ညည့် ၁၁ နာရီဝန်းကျင်အထိ စစ်ကောင်စီတပ်က ရပ်ရွာတိသို့ လက်နက်ကြီးတိနန့် အကြိမ်ပေါင်းများစွာ ရည်ရွယ်ချက်ဟိဟိ ယမ်းသန်း ပစ်ခတ်နီခရေလို့ သိရပါရေ။
နိုဗမ်ဘာ ၂၈ ရက်နိ၊ညည့် ၉နာရီခွဲက မောင်တောမြို့နယ်၊ အလယ်သံကျော်အနောက်ဖက် နတ်မြစ်မာရောက်ဟိနီရေ စစ်ကောင်စီနေဗီက လက်နက်ကြီးတိနန့်တသိတမင်ယမ်း သန်းပစ်ခတ်ခပိုင်၊ စစ်ကောင်စီ၏ (၄)မိုင်အခြီစိုက် နခခ (၂) တပ်ရင်းကလည်း လက်နက်ချေတိနန့်ရပ်ရွာတိသို့ လူ မဆန်စွာ ယမ်းသန်း ပစ်ခတ်နီခပါရေ။
ယင်းနီရာနှစ်ခုက ပစ်လိုက်တေ လက်နက်ကြီးတိစွာ ကန် သာယာရွာ၊ ကန်ပြင်သာစည်ရွာ၊ ရွာသာယာရွာ ပတ်ဝန်း ကျင်တိမာ ကျရောက်ပေါက်ကွဲခပါရေ။
တချိန်တည်းမာ အလယ်သံကျော် အနောက်ဖက် နတ်မြစ်ဟိ စစ်ကောင်စီ၏ နေဗီက ရည်ရွယ်ချက်ဟိဟိ ပစ်လိုက်တေ လက်နက်ကြီး တလုံးစွာ ၎င်းရို့ရည်ရွယ်ရာ ရပ်ရွာတိသို့မကျခဘဲ ကံကောင်းထောက်မစွာဖြင့် စစ်ကောင်စီ ၏ (၄) မိုင်အခြီစိုက် နခခ( ၂)တပ်ရင်းဟိ လူပျို ဘားတန်းဆောင်မာ ကျရောက်ပေါက်ကွဲလားရေလို့လည်း သိရပါရေ။
အလားတူ ယင်းနို(ဗမ်ဘာ ၂၈ ရက်နိ)မာပင် ညည့် ၈နာရီ ၃၅ မိနစ်က မောင်တောမြို့နယ်၊ဂြင်းတော(မူဆလင်)ရွာပျက်၏ အနောက်ဖက်ပင်လယ်ပြင်မာ ရောက်နီရေ နေဗီစွာ အရှိဖက်ဟိ မေယုတောင်တန်းဖက်သို့ လက်နက်ကြီး တိနန့် (၅)ကြိမ်တိတိ ရမ်းသန်း ပစ်ခတ်ခပါသိမ့်ရေ။
ယင်းပိုင်ဗျာယ် ယင်းနိ နိုဗမ်ဘာ ၂၈ ရက်နိ၊ညဇာ ၆ နာရီကျော်လောက်ကပင် ၈ နာရီကျော်အထိ မောင်တော နခခ (၅) နယ်ခြားစောင့်တပ်ရင်းက ယမ်းသန်း ပစ်လိုက်တေ လက်နက်ကြီးကျည်တိ အထဲက ၄ လုံးစွာ ရွာသာယာရွာပတ်ဝန်းကျင်တိသို့ ကျရောက်ပေါက်ကွဲခကြောင်းသိရပါရေ။
အကြမ်းဖက် စစ်ကောင်စီစွာ ရက္ခိုင့်တပ်တော်AA နန့်ဖြစ် ပွားနီရေတိုက်ပွဲတိမာ အကျအဆုံးတိအလွန်များနီပြီးကေ အဖက်ဖက်က ကျယှုံးနီရေအတွက် “အကြံကုန်ဂဠုန်ဆားချက်” ဆိုပိုင် အပြစ်မဲ့ အရပ်သားပြည်သူတိ နန့် ပြည်သူ လူထုရို့နီထိုင်ရာ ရပ်ရွာ၊ နီအိမ်၊ အဆောက်အအုံတိကို လူမဆန်စွာ မီး လောင်တိုက်သွင်းပနာ ရည်ရွယ်ချက်ဟိဟိ တသိတမင် ပစ်ခတ်တိုက်ခိုက် သတ်ဖြတ်လို့ ဟိနီပါရေ။
