ရမ်းဗြဲမြို့မာ ဒေနိ(နိုဗမ်ဘာ ၂၉ ရက်နိ) မိုးထက ဆက်သွယ်ရီး (စာတိုက်)ဝန်ထမ်းတယောက်ကို စစ်ကောင်စီ တပ်ဖွဲ့ဝင်တိက အကြောင်းပြချက်မဟိဘဲ ဖမ်းယူလားကြောင်း သိရပါရေ။
အဖမ်းခံရရေလူစွာ ရမ်းဗြဲမြို့၊ အမှတ် (၆) ရပ်ကွက်၊ ပုလုပ်တောင်ရပ်က အဖ ဦးလှထွန်းဖြူ၏သား ဦးထွန်းဦးခိုင် (၄၅နှစ်) ဖြစ်ကြောင်း သိရပါရေ။
ဒေနိမိုးထ ၇ နာရီကျော်လောက်က စစ်ကောင်စီတပ်ဖွဲ့ဝင် ၅ ယောက်စွာ အမှတ်(၆)ရပ်ကွက်၊ ပုလုပ်တောင်ရပ်သို့ ဝင်ရောက်လာပြီးကေ အကြောင်းတစုံတရာမဟိဘဲ ဦးထွန်းဦးခိုင်ကို ဝင်ဖမ်းလားရေလို့ ဒေသခံတိက ဆိုပါရေ။
ရက္ခိုင်မာ ရက္ခိုင့်တပ်တော် နန့် စစ်ကောင်စီတပ်ရို့ တကျော့ပြန်တိုက်ပွဲဖြစ်ပွားချိန်ကစလို့ စစ်ကောင်စီတပ်က အပြစ်မဲ့ပြည်သူတိကို နိတိုင်းဆိုရေပိုင် မတရားဖမ်းဆီးလျက်ဟိရာ နိုဗမ်ဘာ ၁၃ ရက်နိကနီ နိုဗမ်ဘာ ၂၉ ရက်နိအတွင်း ရက္ခိုင်ပြည်က ဖမ်းဆီးထားရေအပြစ်မဲ့ပြည်သူ ၇၀ ကျော်ဟိလာယာလို့ သိဟိရပါရေ။
