မြောက်ဦးမာ ဒီဇမ်ဘာ ၆ ရက်နိက ရက္ခိုင့်တပ်တော်AA နန့် အကြမ်းဖက် စစ်ကောင်စီတပ် အကြား ထိတွိတိုက်ပွဲဖြစ်ပွားခပြီးနောက်ပိုင်း ဒေနိ(ဒီဇမ်ဘာ ၇ ရက်နိ) မိုးထကစလို့ စစ်ကောင်စီတပ်ဖွဲ့ဝင်တိစွာ မြို့အတွင်းကင်းလှည့်ပနာ လမ်း လားလမ်းလာတိကို တင်းကျပ်စွာစစ်ဆီးနီရေလို့ သိရပါရေ။
ဒေနိမိုးထ ၆ နာရီလောက်ကစလို့ ဒေဂုအချိန်ထိ မြောက် ဦးမြို့တွင်း ကျောက်ရာဇ်ကေ၊ညောင်ပင်စျီး အလယ်စျီး၊ ဘောလုံးကွင်း ၊တောင်ရပ်လမ်းခွဆုံ အပါအဝင် ရပ်ကွက် တိမာ လမ်းလားလမ်းလာတိကို တင်းတင်းကျပ်ကျပ် စစ်ဆီးလို့ဟိနီကြောင်း မြို့ခံတိက ပြောပါရေ။
ယင်းပိုင်စစ်ဆီးရေခါ အကြမ်းဖက်စစ်ကောင်စီတပ်ဖွဲ့ဝင်တိက ခရီးလားပြည်သူတိကို မကြားဝံ့မနာသာ ဆဲဆိုခြိမ်းခြောက်မှုတိလည်း ဟိနီရေလို့ ဆိုပါရေ။
ဒီဇမ်ဘာ ၆ ရက်နိက မြောက်ဦးမြို့၊ ငွေတောင်ပေါက်တန်းတားအနားမာ ရက္ခိုင့်တပ်တော် AA နန့် အကြမ်းဖက် စစ်ကောင်စီတပ်ရို့ကြား တိုက်ပွဲဖြစ်ပွားခရာ စစ်ကောင်စီတပ်ဖွဲ့ဝင် ၄ ယောက်သီဆုံးပြီးကေ ၅ယောက်ဒဏ်ရာရဟိ လားရေလို့ ညီနောင်မဟာမိတ် (၃)ဖွဲ့ကလည်း ထုတ်ပြန် ထားပါရေ။
ရက္ခိုင်ပြည်မာ ကုန်ခရေနိုဗမ်ဘာ ၁၃ ရက်နိကစလို့ ရက္ခိုင့်တပ်တော်AA နန့် စစ်ကောင်စီတပ်ရို့အကြား တကျော့ပြန်တိုက်ပွဲတိဖြစ်ပွားလျက်ဟိရာ နိုင်ငံတဝှမ်း အယှုံးနန့်ဆိုးဝါးစွာ ရင်ဆိုင်နီရရေ စစ်ကောင်စီစွာ အပြစ်မဲ့ပြည်သူတိကို မတရားဖမ်းဆီးစွာ၊ သတ်ဖြတ်စွာတိကို နိစဉ်ရက်ဆက် ဆက်တိုက် ပြုလုပ်လာနီရေအပြင် နီအိမ်တိကိုပါ ဥပဒေမဲ့ စီးနင်းဝင်ရောက်ပနာ လူမဆန်စွာ စစ်ဆီးမူတိလည်း ပြုလုပ်လို့ ဟိနီပါရေ။
Website Link: https://arakanprincess.media/wp-006/
TelegramLink: https://t.me/arakanprincess/6627
