ရက္ခိုင်အပါအဝင် နိုင်ငံအနှံ့တိုက်ပွဲတိမာ အဖက်ဖက်ကထိခိုက်ကျဆုံးမှုတိ အလွန့်အလွန်များပြားနီရေ စစ်ကောင်စီစွာ စစ်တိုက်ဖို့ စစ်သားမဟိသလောက်ဖြစ်လားရေခါ အကျဉ်းထောင်တိအတွင်း အကျဉ်းကျနီရေ စစ်ဗြီး၊ရဲဗြီးတိ အပါအဝင် ထောင်သားတိကိုတိတ်တဆိတ်ခိုးထုတ်ပနာ ရှိတန်းစစ်မြီပြင်တိသို့ ပို့နီကြောင်း သတင်းတိ ထွက်ပေါ်နီပါရေ။
ရက္ခိုင်ပြည်မာလည်း ဒေရက်ပိုင်းစစ်တွေအကျဉ်းထောင်က စစ်ဗြီး၊ရဲဗြီးတိအပါအဝင် ထောင်သား တရာကျော်ကို စစ်ကောင်စီခိုးထုတ်လားကြောင်း ခိုင်မာရေ သတင်းရင်း မြစ်တိက ဆိုပါရေ။
၂၀၂၃ ခုနှစ်၊ အောက်တိုဘာ ၂၇ ရက်နိက ညီနောင်မဟာ မိတ် (၃)ဖွဲ့ စတင်လိုက်တေ ၁၀၂၇ စစ်ဆင်ရီးအတွင်း ညီနောင်မဟာမိတ်တိအပြင် တော်လှန်ရီး မဟာ မိတ်အဖွဲ့ရို့၏ ဟန်ချက်ညီ ထိုးစစ်ဆင် တိုက်ခိုက်မှုတိကြောင့် ဘုံရန်သူအကြမ်း ဖက်စစ်ကောင်စီစွာ တပ်စခန်း တခုပြီးတခု၊ မြို့တမြို့ပြီးတမြို့ လက်လွှတ်ဆုံးယှုံးနီရပိုင် စစ်ကောင်စီတပ်ဖွဲ့ဝင်တိလည်း အများအပြား ထိခိုက်သီဆုံးခြင်း၊ တပ်ဗြီးများလာခြင်း၊ အညံ့ခံ လက်နက်ချ အလင်းဝင်လူများလာခြင်းရို့ကြောင့် စစ်ကောင်စီမာ စစ်တိုက်ဖို့လူ မဟိသလောက်နည်းပါးလာရခြင်းဖြစ်ပါရေ။
ယေဇူးနန့် အရှက်အသရေမဟိ၊ မဖွယ်မရာ အောက်တန်းကျရေ နည်းလမ်းမျိုးစုံကိုသုံးပနာ စစ်သားစုဆောင်းမှုတိကို စက်ဆုပ်ဖွယ်ရာ လုပ်ဆောင်လာနီပါရေ။
ကုန်ခရေ ဒီဇမ်ဘာ ၇ ရက်နိ၊ မိုးထ ၁၀ နာရီကျော်လောက်မာ စစ်ကောင်စီစွာ စစ်တွေအကျဉ်းထောင်က ပြစ်ဒဏ်ကျ စစ်ဗြီး၊ ရဲဗြီးအပါအဝင် ထောင်သား ၁၀၀ ကျော်ကို စစ်မှုပြန်ထမ်းဖို့ မျက် နှာဖုံးစွပ်ပနာ စစ်ကား ၃ စီးနန့် ခေါ်ထုတ်လားရေလို့ နာမည်မဖော်လိုရေ ထောင်ဝန် ထမ်းတယောက်က အခိုင်အမာ ပြောပါရေ။
အလားတူ မန္တလေး၊ အိုးဘိုထောင်က ထောင်ကျစစ်သား ၁၂၅ ယောက်၊ ထုံးဘိုရဲဖက်စခန်းက ၈ ယောက်၊ ပြည်ထောင်ကအယောက် ၄၀၊ ပေါင်းတည်ထောင်က ၁၇ ယောက်၊ တောင်ငူထောင်က ၆၂ ယောက်နန့် ကလေးထောင်က အကျဉ်းကျစစ်သား ၁၆ ယောက်ရို့ကိုလည်း စစ်ကောင်စီတပ်က ဒေရက်ပိုင်းအတွင်း ခေါ်ထုတ်လားရေလို့ ဒေသတွင်းသတင်းတိအရ သိရပါရေ။
စစ်ကောင်စီပြောခွင့်ရ ဇော်မင်းထွန်းကလည်း “စစ်ဗြီး၊ရဲဗြီးတိကို ပြစ်ဒဏ်က လွတ်ငြိမ်းခွင့်ပြုပနာ စစ်မှုပြန်ထမ်း ခွင့်ပြုဖို့” လို့ ဒီဇမ်ဘာ ၃ ရက်နိ ညဇာမာ စစ်ကောင်စီဝါဒဖြန့်မီဒီယာတိကတဆင့် ပြောဆိုထားပါရေ။
အဂုပိုင် အကြမ်းဖက်စစ်ကောင်စီ၏ လတ်တလော လုပ်ဆောင်ချက်တိနန့်ပတ်သက်လို့ ရက္ခိုင်နိုင်ငံရီးသမားတယောက်က ” ဒေချင့်က စစ်ကောင်စီစွာ တစတစပြိုလဲလာရေဆိုစွာကိုပြနီပါရေ။ တပ်ဖွဲ့စည်းပုံလုံးလုံးပျက်လားရေဆိုရေ အနီအထားပါ။ နောက်တခုက စစ်ကောင်စီစွာ သူရို့တောင် ထိန်းမနိုင်သိမ်းမရလို့ ထောင်ချထားရရေ ပြစ်မှုမျိုးစုံကျူးလွန်ထားရေ ရာဇဝတ်သားတိကို လက်နက်ပြန်အပ်ပြီးကေ ပြည်သူကို အကြီးအကျယ် အဆိုးဝါးဆုံး ဒုက္ခပီးဖို့ လုပ်နီရေ” လို့ သုံးသပ် ပြောဆိုပါရေ။
စစ်ကောင်စီစွာ လက်ဟိ မြန်မာပြည်အနှံ့မာ စစ်ဗြီး၊ရဲဗြီးတိအပြင် စစ်မှုထမ်းဟောင်း၊ ရဲမှုထမ်းဟောင်းတိကို အတင်းအကြပ် စစ်မှုထမ်းခိုင်းနီရေပိုင် နိုင်ငံ့ဝန်ထမ်း၊ ဌာနဆိုင်ရာ အရပ်ဖက်ဝန်ထမ်းတိကိုပါ အတင်းအဓမ္မရှိ တန်းပို့ဖို့စီစဉ်နီရေလို့လည်း သတင်းရထားပါရေ။
