ဒေနိ(ဒီဇမ်ဘာ ၁၇ရက်နိ) နိခင်းပိုင်းက အမ်းမြို့နယ်၊ကဇုကိုင်းရွာကို စစ်ကောင်စီတပ်က ဒရုန်းသုံးပနာ ဒရော့ဗုံး ကြဲချလို့ ဒေသခံပြည်သူတိ ထွက်ဗြီးတိမ်းယှောင်နီရကြောင်း သိရပါရေ။
ရက္ခိုင့်တပ်တော်နန့်စစ်ကောင်စီတပ်ရို့စွာ ဒေနိ(ဒီဇမ်ဘာ ၁၇ ရက်နိ)နိခင်း ၂ နာရီ ၄၇ မိနစ်က အမ်းမြို့နယ်၊ ကဇုကိုင်း အနားမာ ထိတွိတိုက်ပွဲစကေ ဖြစ်ပွားခပြီးနောက် စစ်ကောင်စီတပ်က ကဇုကိုင်းရွာကို ဒရုန်းအသုံးပြုပနာ ဒရော့ဗုံးနန့် ကြဲချနီရေအတွက် ရွာသားတိထွက်ဗြီးတိမ်းယှောင်နီရရေလို့ ဒေသခံတိက ဆိုပါရေ။
စစ်ကောင်စီ၏ အဆိုပါဒရော့ဗုံးကြဲချမှုကြောင့် အရပ်သားပြည်သူတိ ထိခိုက်မှုအနီအထားကို APM က ဆက်လက်စုံ စမ်းနီပါရေ။
ဒေနိ တရက်တည်းမာပင် ရသေ့တောင်အခြီစိုက် စစ်ကောင်စီတပ် ခမရ (၅၃၇)က ရပ်ရွာတိကို လက်နက်ကြီး တိနန့်(၅)ကြိမ်ပစ်ခတ်ခရေအပြင် မောင်တောမြို့နယ်၊အင်းဒင်အခြီစိုက် စစ်ကောင်စီတပ် နခခ(၆)တပ်ရင်းကလည်း အောင်သုခရွာနန့် ကိုးတန်းကောက်ရွာကြား မေယုတောင်တန်းသို့ လက်နက်ကြီး(၆)ကြိမ်တိုင်တိုင် ပစ်ခတ်ခပါရေ။
အလားတူ ဒေနိ နိခင်း ၂ နာရီလောက်က စစ်ကောင်စီ၏ နေဗီ ၂ စီးက ပေါက်တောမြို့နယ်နန့် ပုဏ္ဏားကျွန်းမြို့နယ် မြစ်ကြောင်းဟိ ကျေးရွာတိကို လက်နက်ကြီး၊လက်နက်ချေတိနန့် ယမ်းကားပစ်ခတ်ခလို့ ဒေသခံပြည်သူတိ ထွက်ဗြီး နီရကြောင်း သိရပါရေ။
တကျော့ပြန်တိုက်ပွဲ စဖြစ်ကတည်းကပင် စစ်ကောင်စီစွာ အရပ်သားပြည်သူတိနီထိုင်ရာ မြို့ရွာတိကိုရာ အဓိက ပစ်မှတ်ထားပနာ ရည်ရွယ် ချက်ဟိဟိ သဲကြီးမဲကြီးပစ် ခတ်မှုတိကို နိစဉ်ရက်ဆက်ပြုလုပ်နီရေအတွက် ရက္ခိုင်ပြည်မာ ရက္ခိုင်တပ်တော်နန့် စစ်ကောင်စီတပ်ရို့အကြားတိုက်ပွဲတိက အေထက်မက ကြီးမားကျယ်ပြန့် ပြင်းထန်လာနိုင်ကြောင်း စစ်ရီးလေ့လာသူတိက သုံးသပ်နီကတ်ပါရေ။
