ဘူးသီးတောင်မြို့နယ်မာ ဒေနိ(ဒီဇမ်ဘာ ၂၅ ရက်နိ)၊ နိခင်း ၁၁ နာရီလောက်က စပါးရိတ်နီရေ မူဆလင် အမျိုးသား တယောက်ကို စစ်ကောင်စီတပ်က သီနတ်နန့် လှမ်းပစ်လို့ ပြင်းပြင်းထန်ထန် ဒဏ်ရာရဟိလားကြောင်း သိရပါရေ။
ဒဏ်ရာရလားလူမာ ဘူးသီးတောင်မြို့နယ်၊ဖရုံချောင်းအုပ်စု၊ပြိုင်းတောင်(မူဆလင်)ရွာက ဦးအဒူလာချိန်း(၃၂ နှစ်) ဖြစ်ပါရေ။
ဦးအဒူလာချိန်းစွာ ဒေနိ၊နိခင်း ၁၁ နာရီလောက်မာ ရွာနားက လယ်ကွင်း အတွင်း စပါးရိတ်နီချိန် ဖရုံချောင်း(ရက္ခိုင်ရွာ) ဘုန်းကြီးကျောင်းတောင်ကုန်းမာ ဝင်ရောက်အခြီပြုနီရေ စစ်ကောင်စီ၏ တပ်မ(၂၂) လက်အောက်ခံ၊ ခမရ (၂၀၆) တပ်ရင်းက လက်နက်ချေတိနန့် ပစ်တေလို့ ရွာသားတိက ပြောပါရေ။
ယင်းပိုင် ပစ်ခတ်မှုကြောင့် ဦးအဒူလာချိန်း၏ဝမ်းမာ ပြင်းပြင်းထန်ထန် ဒဏ်ရာရလားရေလို့ ဆိုပါရေ။
လက်ဟိမာ အဒူလာချိန်းကို ဘူးသီးတောင်မြို့၊ဆီးရုံကြီးသို့ ဆီးကုသမှုခံယူဖို့ အရေးပေါ် ပို့ဆောင်လိုက်ရကြောင်း သိရပါရေ။
