ဟုမ္မလင်းတိုက်ပွဲစစ်ကောင်စီတပ် ၃ ဦးသေ၊ ၇ ဦး ဒဏ်ရာရ ​သေနက် ၃ လက်နှင့် ခဲယမ်းများ၊ဗုံးသီးများသိမ်းဆည်းရမိ တမူးတိုက်ပွဲတွင်လည်း စစ်တပ် ၅ ဦး​သေ၊ ၇ ဦးဒဏ်ရာရပြီး လက်နက်ခဲယမ်းများ​တော်လှန်​ရေးအဖွဲ့များရ

စစ်ကိုင်းတိုင်း၊ ဟုမ္မလင်းမြို့နယ်အတွင်း ဝင်ရောက်လာသော စစ်ကောင်စီစစ်ကြောင်းကို အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ အမှတ်(၁)စစ်ဒေသ၊ မော်လိုက်ခရိုင် တပ်ရင်းက ပိတ်ဆို့တိုက်ခိုက်ခဲ့ရာ စစ်ကောင်စီဘက်မှ သုံးဦး သေဆုံးပြီး ခုနစ်ဦး ဒဏ်ရာရသွားကြောင်းအမှတ်(၁) စစ်ဒေသက ထုတ်ပြန်ထားသည်။

ဖောင်းပြင်မြို့မှ စစ်ကူထွက်လာသော စစ်ကောင်စီခြေလျင်တပ်ရင်း ခလရ(၂၇၂) စစ်ကြောင်းကို ဇန်နဝါရီလ (၂) ရက်တွင် ကြားဖြတ် တိုက်ခိုက်ခဲ့ခြင်းဖြစ်သည်။

တိုက်ပွဲတွင် MA-3 နှစ်လက်၊ ကျည်မျိုးစုံ ၂၃၀၀ ကျော်၊ ဗုံးသီး ၂၀ကျော်၊ မိုင်းနှစ်လုံးနှင့် ကျည်အိမ် (၁၀) ခုကျော် သိမ်းဆည်းရမိခဲ့ကြောင်း ဇန်နဝါရီလ ၃ ရက်တွင် ပုံနှင့် တစ်ကွထုတ်ပြန်သည်။

ပြီးခဲ့သည့် ဒီဇင်ဘာလ ၂၆ရက်ကလည်း အမှတ်(၁)စစ်ဒေသတွင်ပါဝင်သည့် တမူးမြို့နယ်၊ အောင်ဇေယျ ဟုမ္မလင်းလမ်း၌ ဒု-တပ်ရင်းမှူးတစ်ဦးဦးစီးသော ခမရ-၃၀၉၊ SNA နှင့် ပျူစောထီး ပူးပေါင်းအင်အား (၃၅) ဦးအား ပြည်သူ့ကာကွယ်ရေး ပူးပေါင်းတပ်ဖွဲ့များက တိုက်ခိုက်ခဲ့သည်။ ယင်းတိုက်ပွဲ၌ စစ်ကောင်စီဘက်မှ ငါး ဦး သေဆုံးပြီး ခုနစ် ဦး ထိခိုက် ဒဏ်ရာရကာ လက်နက်ခဲယမ်းများ သိမ်းယူနိုင်ခဲ့ကြောင်းအမှတ်(၁) စစ်ဒေသကထုတ်ပြန်ထားသည်။

လက်ရှိတွင် ဟုမ္မလင်းမြို့နယ်၊ ရွှေပြည်အေးမြို့၊ ဖောင်းပြင်မြို့နှင့် တမူးမြို့နယ်ပတ်ဝန်းကျင်၌ စစ်ကောင်စီ စစ်ရေးလှုပ်ရှားမှုများ ရှိနေသည်ဟု ​ဒေသခံ အချို့က​ပြောသည်။ ရွှေပြည်အေးမြို့သည် ပြည်သူ့ကာကွယ်ရေးတပ်ဖွဲ့များက ထိန်းချုပ်ထားသည့်မြို့ဖြစ်သည်။