စစ်ကောင်စီက ရီကြောင်းနန့် စစ်ကူအင်အားတိ ထပ်ဖြည့်နီလို့ ပေါက်တောမြို့တွင်း ရက္ခိုင့်တပ်တော် (AA) နန့် စစ်ကောင်စီတပ်အကြား ဂျန်နဝါရီ ၆ ရက်နိ တရက်ပြတ်လုံး တိုက်ပွဲတိ ပြင်းပြင်း ထန်ထန် ဖြစ်ပွားနီရေလို့ ညီနောင်မဟာမိတ် (၃)ဖွဲ့က ဂျန်နဝါရီ ၆ ရက်နိ ညည့်သိုင်ခေါင်ယံအချိန်မာ ထုတ်ပြန်လိုက်ပါရေ။
ပေါက်တောမြို့ တိုက်ပွဲနန့်ပတ်သက်လို့ ညီနောင်သုံးဖော်က “ရက္ခိုင်ပြည်၊ ပေါက်တောမြို့တွင် စစ်ကောင်စီသည် ရီကြောင်းဖြင့် စစ်ကူအင်အားများ ထပ်မံ ဖြည့်တင်းလာသည့်အတွက် ရက္ခိုင့်တပ်တော် (AA) နန့် နှစ်ဖက် ရင်ဆိုင်ထိတွိ တိုက်ပွဲများမှာ ဒေနိတရက်လုံး ဆက်လက်ပြင်းထန်လျက်ဟိသည်”လို့၎င်းရို့၏ဂျန်နဝါရီ ၆ရက်နိ စစ်သတင်း ထုတ်ပြန်ချက် ထဲမာ ထည့်သွင်း ဖော်ပြထားပါရေ။
ယင်းနောက် ဂျန်နဝါရီ ၆ ရက်နိ၊ ညဇာ ၉ နာရီလောက်မာ လည်း ရက္ခိုင်ပြည်၊ ကျောက်တော်မြို့နယ်၊ တင်းမရွာနားဟိ စစ်ကောင်စီ၏ အမာခံ တောင်ရှည်တောင်ဗျူဟာကုန်း ကြီးတခုလုံးက စစ်ကောင်စီ တပ်ဖွဲ့ဝင်တိ အားလုံး တယောက်မကျန် ရက္ခိုင့်တပ်တော်(AA) ထံမာ လက်နက်ချ အညံ့ခံလိုက်ကတ်ယာလို့ ညီနောင်(၃)ဖွဲ့က ထုတ်ပြန်ပါရေ။
ယေပြီးကေ စစ်ကောင်စီ၏ ပလက်ဝမြို့တွင်းဟိ အဓိကနန့် စခန်းကုန်းကြီးတိဖြစ်တေ“စကခ(၁၉)”၊ “တပ်မ (၁၁)” ရှိတန်းတပ်မဌာနချုပ်(၂)ခုအပါအဝင် ပလက်ဝ-ကျောက် တော်အစပ် “မီးဝဗျူဟာကုန်း”ရို့မာ ကျန်နီရေ စခန်းတိ အားလုံးကို အပြီးသတ်သိမ်းပိုက်နိုင်ဖို့အတွက်ရက္ခိုင့်တပ်တော်(AA)က ထိုးစစ်ဆင်တိုက်ခိုက်လျက်ဟိရေလို့ ဆိုပါရေ။
ယင်းအပြင် ရမ်းဗြဲ၊ ကျောက်ဖြူ၊ မာန်အောင်၊ ဂွနန့် သံတွဲမြို့နယ်တိမာ မြီပြင် စစ်ကူအင်အား ထောက်ပို့ ပီးနိုင်စွမ်းမဟိရေအတွက် စစ်ကောင်စီစွာ ရီကြောင်းနန့် လက်နက်၊ စစ်ကူအင်အားတိဖြည့်တင်းနီပြီးကေ ဒေရက်ပိုင်းအတွင်း စစ်ကောင်စီက ရီကြောင်းအင်အားတိုးပနာ အယင်ထက် ပိုမို လှုပ်ယှားလာနီကြောင်းကိုလည်း ညီနောင် မဟာမိတ် (၃)ဖွဲ့၏ ထုတ်ပြန်ချက်မာ ဖော်ပြထားပါရေ။
