ဂျန်နဝါရီ ၁၁ရက်နိ၊ မိုးထပိုင်းမာ စစ်ကောင်စီတပ်၏ လက်နက်ကြီးပစ်ခတ်မှု၊ ဒရုန်းအသုံးပြု ဒရော့ဗုံးကြဲချမှုတိကြောင့် ပေါက်တောမြို့နယ်က အာရက္ခပြည်သူ နှစ်ယောက် ဒဏ်ရာရလားကြောင်း သိရပါရေ။
ဒဏ်ရာရလားရေလူတိစွာ ပေါက်တောမြို့နယ်၊ သဝင်ချောင်းရွာက ဦးစံရွှီမြ(၆၃နှစ်)နန့် ဦးမောင်စံနု(၆၂နှစ်) ဖြစ်ပါရေ။
ဂျန်နဝါရီ ၁၁ ရက်နိ၊ မိုးထ ၉ နာရီကျော်လောက်မာ စစ်ကောင်စီတပ်၏ စစ်တွေအခြီစိုက်ရဲတပ်ရင်း(၁၂)ကနီပြီးကေ ပေါက်တောမြို့နယ်က ရပ်ရွာတိကို လက်နက်ကြီးတိနန့်လှမ်းပစ်ခပါရေ။
ယင်းလက်ကြီးကျည်တလုံးစွာ သဝင်ချောင်းရွာဟိ ဦးစံရွှီမြ သမီး ဒေါ်ဝေဝေဦး၏ အိမ်ရှိ လမ်းဘေးမာ ကျရောက် ပေါက်ကွဲခပြီးကေ အိမ်ထဲမာထိုင်နီရေ ဦးစံရွှီမြ၏ ဘေးခတ်နန့် ညာဖက်လက်မောင်းမာ ဒဏ်ရာ ပြင်းပြင်းထန် ထန် ရလားပါရေ။
တချိန်တည်းမာပင် ယင်းသဝင်ချောင်းရွာကို စစ်ကောင် စီတပ်က ဒရုန်းနန့်လည်း ဒရော့ဗုံးတလုံး ကြဲချခခလို့ ဦးမောင်စံနု၏ အိမ်ရှိမာ ကျရောက်ပေါက်ကွဲခပြီးကေ ဦးမောင်စံနု၏ ညာဖက် လက်မောင်း ဒဏ်ရာရလားခရပါသိမ့်ရေ။
လက်ဟိအချိန်ထိလည်း သဝင်ချောင်းရွာအပါအဝင် ပေါက်တောမြို့နယ်က၊ ရပ်ရွာတချို့ကို စစ်ကောင်စီ၏ စစ်တွေအခြီစိုက် ရဲတပ်ရင်း(၁၂)ကနီ လက်နက်ကြီးနန့်အဆက်မပြတ်ပစ်ခတ်နီရေပိုင် စစ်ကောင်စီနေဗီတိကပါ ရည်ရွယ်ချက်ဟိဟိ လက်နက်ကြီးပစ်ခတ်နီသိမ့်ပြီးကေ ဒေသခံတိလည်း ဖီးလွတ်ရာသို့ တိမ်းယှောင်နီကတ်ရကြောင်း သိဟိရပါရေ။
