ဂျန်နဝါရီ ၁၂ ရက်နိ၊ ညည့်ပိုင်းက စစ်ကောင်စီတပ်၏ လီကြောင်း အသုံးပြု ဗုံးကြဲတိုက်ခိုက်မှုကြောင့် ကျောက်တော်မြို့နယ်က အပြစ်မဲ့ အာရက္ခပြည်သူ တယောက် သီဆုံးလားခပြီးကေ အချေတယောက်အပါအဝင် ၂ ယောက် ပြင်းပြင်း ထန်ထန် ဒဏ်ရာရလားခကြောင်း သိရပါရေ။
သီဆုံးလားရေလူစွာ ကျောက်တော်မြို့နယ်၊ လက်ပံရွာက ဒေါ်စံဂိုးမ(၆၀ နှစ်)ဖြစ်ပြီးကေ၊ ဒဏ်ရာရလားရေလူတိကတော့ မောင်ဝင်းခိုင်(၅ နှစ်)နန့်ဦးမောင်သောင်းစိန်(၆၂ နှစ်)ရို့ဖြစ်ကတ်ပါရေ။
ဂျန်နဝါရီ ၁၂ရက်နိ၊ ညည့် ၁၀ နာရီခွဲလောက်က ဒေါ်စံဂိုးမ၊ မောင်ဝင်းခိုင်နန့် ဦးမောင်သောင်းစိန်ရို့စွာ သရီချောင်းထဲဟိ ၎င်းရို့ပိုင်ကွမ်းခင်းစိုက်ပျိုးရီးခြံထဲကတဲမာ ဟိနီချိန် စစ်ကောင်စီ၏ Y 12 လီယာဉ်က ဗုံးကြဲတိုက်ခိုက်ခရေလို့ ဒေသခံတိက ပြောပါရေ။
ယင်းဗုံးကြဲတိုက်ခိုက်မှုကြောင့် ဒေါ်စံဂိုးမ၏ လိုင်ဂုတ်နန့် ဘေးစကို ဗုံးစထိမှန် သီဆုံးလားခပြီးကေ၊ မောင်ဝင်းခိုင်၏ ညာဖက်လက်၊ ညာဖက်ခြီထောက် နန့် ဦးမောင်သောင်းစိန်၏ ဘယ်ဖက်လက်ရို့မာ ဒဏ်ရာ ပြင်းပြင်းထန်ထန်ရလားရေ လို့ ဆိုပါရေ။
ရက္ခိုင်မာ ရက္ခိုင့်တပ်တော်AAနန့် စစ်ကောင်စီတပ်ရို့တကျော့ပြန်တိုက်ပွဲစတင်ဖြစ်ပွားချိန်ကစလို့ စစ်ကောင်စီတပ်စွာ အရပ်သားပြည်သူတိနီထိုင်ရေ ရပ်ရွာ၊ နီရာတိကို လက်နက်ကြီး၊ လက် နက်ချေတိ၊ တိုက်လီယာဉ်တိ၊ စစ်ရဟတ် ယာဉ်တိနန့် ရည်ရွယ်ချက်ဟိဟိ နိစဉ်ရက်ဆက် ဆက်တိုက်ပစ်ခတ်၊ ဗုံးကြဲတိုက်ခိုက်လို့ ဟိနီပါရေ။
ယင်းပိုင် ပြည်သူကို အဓိက ပစ်မှတ်ထားဦးတည်ပြီးကေ လူမဆန်စွာ တိုက်ခိုက်နီမှုကြောင့် အရပ်သားပြည်သူတိ သီဆုံး၊ ထိခိုက်ဒဏ်ရာရမှုတိ၊ အိုးအိမ်အဆောက်အအုံပျက်စီဆုံးယှုံးမှုတိ တရက်ထက်တရက် ပိုလို့ တိုးပွားများ ပြားလာနီပါရေ။
