စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်ရှိ ရေလည်မော်ကျေးရွာကို စစ်ကောင်စီက မီးရှို့ဖျက်ဆီးသွားကြောင်း ဒေသခံများက ပြောသည်။
ယနေ့(ဇန်နဝါရီ၂၄ ရက်) နံနက် ၃နာရီခန့်က မန္တလေးတိုင်း၊ စဥ့်ကူးမြို့နယ်၊ ရွာသာယာပျူစောထီးကျေးရွာမှ စစ်ကောင်စီတပ်သားနှင့် ပျူစောထီးများသည် စက်လှေဖြင့် ဧရာဝတီမြစ် ဖြတ်သန်းလာပြီး ဝက်လက်မြို့နယ်၊ ကမ်းဖြူအုပ်စုရှိ ရေလည်မော်ရွာသို့ စက်သေနတ်များ၊ လက်နက်ကြီး ၊လက်နက်ငယ်များပစ်ခတ်၍ ဝင်ရောက်ခဲ့ကြောင်း ဒေသခံများက ပြောသည်။
ထို့နောက် နံနက် ၄နာရီခန့်တွင် စစ်အုပ်စုသည် ရေလည်မော်ကျေးရွာရှိ နေအိမ် ၁၂လုံးခန့်နှင့် ပဲမှော်စင် တစ်လုံး ၊ ဆိုင်ကယ် နှစ်စီးအား မီးရှို့ဖျက်ဆီးသွားကြောင်း Wetlet Informational Network အဖွဲ့၏ တာဝန်ရှိသူက ပြောသည်။
“အင်အားက ၁၂ကောင်တည်း။ စက်လှေအသေးနဲ့လာတာ။ တိုက်ပွဲမရှိပါဘူး။ သက်သက်မဲ့ဝင်ရှို့သွားတာ။”ဟု Wetlet Informational Network အဖွဲ့၏ တာဝန်ရှိသူက ပြောသည်။
စစ်အုပ်စုသည် မီးရှို့ဖျက်ဆီးပြီးနောက် ရွာသာယာပျုစောထီးရွာသို့ ပြန်ဝင်သွားကြောင်း သိရသည်။
ထို့အပြင် ရွာသာယာကျေးရွာမှ စစ်ကောင်စီတပ်နှင့်ပျူများသည် ဧရာဝတီမြစ်အနောက်ဘက်ခြမ်း ဝက်လက်နယ်အတွင်းရှိ ကျေးရွာများထံသို့ လက်နက်ကြီးများဖြင့်လည်း အကြောင်းမဲ့ ပစ်ခတ်ခြင်း၊ ဒရုန်းဖြင့်ဗုံးချတိုက်ခိုက်ခြင်းများ ပြုလုပ်လေ့ရှိကြောင်း ဒေသခံများက ပြောသည်။
စဥ့်ကူးမြို့နယ်နှင့် ဝက်လက်မြို့နယ်သည် ဧရာဝတီမြစ်တစ်ဖက်ကမ်းစီ၌ တည်ရှိပြီး စစ်ရေးအရ နယ်မြေထိဆက်မှုရှိနေသည်။
