ရခိုင်ပြည်နယ်တွင် စစ်ရှုံးနေသည့် အကြမ်းဖက်စစ်ကောင်စီတပ်က စစ်တွေမြို့ခံများကို သွားလာခွင့်မပေးဘဲ ပြန်ပေးဆွဲဓားစာခံပြုလုပ်ထားကြောင်း ရက္ခိုင့်တပ်တော် AA ၏ ပြောဆိုခွင့်ပုဂ္ဂိုလ် ခိုင်သုခကပြောသည်။
စစ်တွေမြို့တွင် တိုက်ပွဲဖြစ်ပွားမှု တစ်စုံတစ်ရာ မရှိဘဲ လမ်း၊ တံတားများဖျက် ဆီးခဲ့ပြီး စစ်တွေအဝင်လမ်း တံတားကို မိုင်းခွဲဖျက်ဆီးခဲ့ကြောင်း၊ ယင်းအပြင် မြို့ခံများကို မြို့ပြင်ထွက်ခွင့် မပေး၍ အပြင်ထွက်ခွင့် မရကြကြောင်း ခိုင်သုခကပြောသည်။
လက်ရှိအချိန်တွင် စစ်တွေ မြို့ခံများမှာ အကြမ်းစစ်ကောင်စီ၏ ပြန်ပေးဆွဲ ဓားစာခံအဖြစ် ဖမ်းဆီးခံထား ရသည့် အနေအထားသို့ ရောက်ရှိနေကြောင်း ပြောဆိုထားသည်။
ယင်းသို့ ဓားစာခံအဖြစ်ဖမ်းဆီးထားသည့် ပြည်သူများကို လက်နက်ကြီးများဖြင့် ပစ်ခတ်တိုက်နေခြင်းသည် လူသားဆန်မှုကင်းသည့် လုပ်ရပ်သာဖြစ်ပြီးစစ်ရာဇဝတ်မှုကို ပြောင်ပြောင်တင်းတင်း ချိုးဖောက်နေခြင်း ဖြစ်သည်ဟု ခိုင်သုခက သတင်းစာရှင်းလင်းပွဲတွင် ပြောသည်။
ပြီးခဲ့သည့် ဖေဖော်ဝါရီလ ၂၉ ရက် နံနက် ၈ နာရီ ၁၀ မိနစ်ခန့်တွင် အကြမ်းဖက် စစ်ကောင်စီအဖွဲ့၏ စစ်တွေမြို့အနီး ရေတပ် စစ်သင်္ဘောမှ လက်နက်ကြီးပစ် ခတ်မှုကြောင့် အပြစ်မဲ့အရပ်သားပြည်သူ ၁၂ ဦးနေရာတွင်သေဆုံးခဲ့ရကာ အပြင်း စား ဒဏ်ရာရသူ ၃၁ ဦး၊ အလတ်စား၊ အသေးစားဒဏ်ရာရသူ ၅ဝ နီးပါးအထိရှိကြောင်း ရက္ခိုင်အမျိုးသားအဖွဲ့ချုပ်က ထုတ်ပြန်ခဲ့သည်။
