ရှမ်းပြည်တောင်ပိုင်း၊ ပင်လောင်းမြို့နယ်နဲ့ ကရင်နီပြည်နယ် လွိုင်ကော်မြို့ကို ဆက်သွယ်ထားတဲ့ ပြည်ထောင်စုကားလမ်းပေါ်က နောင်ဝိုးတံတားဟာ မတ်လ ၃၀ ရက်မှာ စစ်ကောင်စီပစ်ခတ်တဲ့ လက်နက်ကြီးကျလို့ ပျက်စီးသွားတယ်လို့ ဒေသခံတွေထံက သိရပါတယ်။
နောင်ဝိုးနဲ့ ဆောင်းပြောင်း ဆက်သွယ်ထားတဲ့ ဒီတံတားဟာ ကွန်ကရစ်တံတားတစ်စင်းဖြစ်ပြီး အရင်သံပေါင်ဘေလီတံတားနေရာမှာ အစားထိုး ဆောက်ထားတဲ့ တံတားဖြစ်တယ်လို့ ဒေသခံတွေထံက သိရပါတယ်။
အဲဒီတံတားဟာ ရှမ်းပြည်နဲ့ ကရင်နီပြည် ၂ ခုအတွက် ဆက်သွယ်ရေးမှာ အရေးပါတဲ့တံတားဖြစ်ပြီး ပင်လောင်းမြို့နယ်က နောင်ဝိုး၊ ကားရား၊ ဆောင်းပြောင်း၊ နမ့်ဖာမူ၊ ကုန်းပေါ၊ ဗန်းမော် ၊ တောင်မဲသင်းစတဲ့ ရွာတွေအပါအဝင် ဘေးဝန်းကျင်က ရွာတွေအတွက် စီးပွားကူးသန်းသွားလာ တဲ့နေရာမှာ အဓိကအထောက်အပံ့ဖြစ်တဲ့ တံတားဖြစ်တယ်လို့ ဒေသခံတွေက ပြောပါတယ်။
ပြီးခဲ့တဲ့ မတ်လ ၁၀ ရက် က တော်လှန်ရေးတပ်ဖွဲ့တွေနဲ့ စစ်ကောင်စီတပ်တွေ တိုက်ခိုက်ရာမှာ စစ်ကောင်စီတပ်ရဲ့ လက်နက်ကြီးဒဏ်ကြောင့် ပင်လောင်းမြို့နယ်ထဲက နောင်ဝိုးဘုန်းကြီးကျောင်း၊ စျေးနဲ့ အိမ်အချို့ ပျက်စီးခဲ့ရပြီး လက်ရှိအခြေအနေမှာ တိုက်ပွဲတွေ မဖြစ်နေပေမယ့် စစ်ကောင်စီက လက်နက်ကြီးနဲ့ ပစ်ခတ်နေတာတွေရှိနေတယ်လို့သိရပါတယ်။
