ရခိုင်ပြည်နယ်၊သံတွဲမြို့နယ်တွင် အာရက္ခတပ်တော်(AA)နှင့် စစ်ကောင်စီတပ် ယနေ့(ဧပြီလ ၁၃ ရက်)နံနက်တိုက်ပွဲဖြစ်ပွားနေကြောင်းသတင်းရရှိသည်။
သံတွဲမြို့နယ်၊ကွေ့ချောင်းနှင့်ရေစင်ရွာကြား၌ နံနက် ၇နာရီခန့်မှစတင်၍ တိုက်ပွဲဖြစ်ပွားခြင်းဟု သံတွဲမြို့မြို့ခံတဦးကပြောသည်။
“ဖြစ်တာက ရွာဘက်မှာ။ မြို့ပေါ်မှာတော့ စစ်ကားတချို့လှည့်နေတယ်။သင်္ကြန်လည်း လူမရှိဘူး” ဟု ယင်းဒေသခံကပြောသည်။
သံတွဲမြို့နယ်တွင် အမှတ်(၅၅)ခြေလျင်တပ်ရင်း၊ ခြေမြန်တပ်ရင်း၅၆၆-ခမရ(၅၆၆) ၊ ရဲစခန်းတို့ရှိသည်။ ရခိုင်ပြည်နယ်တောင်ပိုင်းရှိ သံတွံဒေသတွင်း၌တိုက်ပွဲဖြစ်ပွားခြင်းမရှိသေးဘဲ ယနေ့ တိုက်ပွဲစတင်ခြင်းဖြစ်သည်။
ပြီးခဲ့သည့်ဖေဖော်ဝါရီလ၂၁ရက်နေ့က စစ်ကောင်စီ၏စစ်မှုထမ်းကိစ္စအတွက် စာရင်းလိုက်ကောက်သည့်အဖွဲ့၌ပါဝင်သော သံတွဲမြို့နယ်၊ ဒါဝကျေးရွာရာအိမ်မှူးဦးဝင်းရွှေသည် သေနတ်ဖြင့်ပစ်သတ်ခံခဲ့ရသည်။
ရခိုင်ပြည်နယ်မှစစ်ကောင်စီစခန်းများအား ထိုးစစ်စင်တိုက်ခိုက်နေသည့်AAသည် ယမန်နေ့ကပင် မောင်တောမြို့နယ်ရှိ အကြီးဆုံးနယ်ခြားစောင့်တပ်ရင်းဖြစ်သည့် ကြိမ်ချောင်းဗျူဟာကို တိုက်ခိုက်သိမ်းပိုက်ခဲ့သည်။
ကြိမ်ချောင်းဗျူဟာ စခန်းသိမ်းတိုက်ပွဲအတွင်း စစ်ကောင်စီရုပ်အလောင်းအမြောက်အမြား၊ သုံ့ပန်းတချို့ နှင့် စစ်တပ် မိသားစုဝင်တချို့ကို ဖမ်းဆီးရမိခဲ့ပြ လက်နက်ခဲယမ်းများလည်း သိမ်းဆည်းရမိခဲ့ကြောင်း AA က ထုတ်ပြန်ထားသည်။
စစ်ကောင်စီ၏ စခန်းများကို တစ်ခုပြီးတစ်ခု ဆက်လက်တိုက်ခိုက်သွားမည်ဖြစ်ပြီး လက်နက်ချအညံ့မခံသော စခန်းများအနေဖြင့် အမြန်ဆုံးလက်နက်ချရန် AAက ထပ်မံသတိပေးထားသည်။စစ်ကောင်စီ၏ လက်နက်ချအညံ့မခံသေးသော နပခ၊ အမ်းဌာနချုပ်၊ ဘူးသီးတောင်၊ စကခ (၁၅) ဌာနချုပ် နှင့် တောင်ကုတ်၊ စကခ (၅) အပါအဝင် လက်ကျန်စခန်းတိုင်းကို တစ်ခုမကျန် ဆက်လက်ထိုးစစ်ဆင် တိုက်ခိုက်သွားမည်ဟု AA က ဧပြီ ၁၂ ရက်ညထုတ်ပြန်ချက်တွင်သတိပေးထားသည်။
AA သည် ရခိုင်ပြည်နယ် ရှစ်မြို့နယ်နှင့် ချင်းပြည်နယ်ပလက်ဝဒေသတစ်ခုလုံးကို သိမ်းပိုက်ထိန်းချုပ်ထားသည်။
မောင်တော ၊ဘူးသီးတောင် ၊အမ်း ၊တောင်ကုတ် စသောမြို့နယ်တို့ရှိ စစ်ကောင်စီတပ်စခန်းများကိုလည်း ထိုးစစ်ဆင်တိုက်ခိုက်နေပြီး နာမည်ကျော် ငပလီကမ်းခြေရှိရာ သံတွဲမြို့နယ်ရှိ စစ်ကောင်စီတပ်ကိုပါစတင်တိုက်ခိုက်လာခြင်းဖြစ်သည်။
