စစ်ကိုင်းတိုင်း၊ မုံရွာခရိုင်ထဲမှာအခြေစိုက်တဲ့ မုံရွာခရိုင်တပ်ရင်း ၂ Chindwin Attack Force 2 ရဲ့ ရဲဘော်အချို့ဟာ အထူးကွန်မန်ဒိုသင်တန်းကို တက်ရောက်နေတယ်လို့ မုံရွာခရိုင်တပ်ရင်း ၂ ဆီက သိရပါတယ်။
အထူးကွန်မန်ဒိုသင်တန်းအတွင်းမှာ မုံရွာခရိုင်တပ်ရင်း ၂ ရဲ့ အခြေခံ စစ်သင်တန်းတက်ရောက်ပြီးသူ လက်ရှိတာဝန်ထမ်းဆောင်ဆဲ ရဲဘော် ၅၀ ခန့် ပါဝင်တယ်လို့ သင်တန်းနည်းပြ ကိုရဲကြီး က ပြောပါတယ်။
အဲဒီသင်တန်းဟာ တပ်ရင်း ၂ ရဲ့ အပတ်စဉ် (၂) အထူးကွန်မန်ဒိုသင်တန်းဖြစ်ပြီး သင်တန်းကာလ ရက် ၁၀၀ သတ်မှတ်ထားတယ်လို့ ဆိုပါတယ်။
ဒါ့အပြင် သင်တန်းပြီးတဲ့အခါမှာ ထူးချွန်ရဲဘော်တွေကို စံပြဆု၊ လေ့ကျင့်ရေးဆုနဲ့ စည်းကမ်းကောင်းမွန်ဆု စတဲ့ဆုတွေကိုချီးမြှင့်သွားမယ်လို့လည်း ဆိုပါတယ်။
သင်တန်းကာလအတွင်း ရဲဘော်တွေအတွက် ရိက္ခာ၊ လေ့ကျင့်ရေးအတွက် ကျည်နဲ့ ရဲဘော်တွေရဲ့ကျန်းမာရေးအတွက် ဆေးဝါးတွေလိုအပ်နေတယ်လို့လည်း သင်တန်းနည်းပြ ကိုရဲကြီး က ပြောပါတယ်။
မုံရွာခရိုင်တပ်ရင်း ၂ ဟာ တပ်ရင်းအခြေစိုက်ရာ ဒေသအနီးတဝိုက်မှာ ဒေသခံတပ်ရင်း၊ တပ်ဖွဲ့တွေနဲ့ ပူးပေါင်းကာ စစ်ဆင်ရေးတွေဖော်ဆောင်လျှက်ရှိတယ်လို့လည်း သိရပါတယ်။
