တော်လှန်အနုပညာရှင်တွေ ဖြစ်ကြတဲ့ ဒေါင်း နဲ့ ဖြူဖြူကျော်သိန်း တို့ သရုပ်ဆောင်ထားကြတဲ့ “မငိုနဲ့တဲ့” အမည်နဲ့ Short Film ကို မေ ၁၉ ရက်၊ ည ၆ နာရီမှာ ထုတ်လွှင့်ခဲ့ပြီး ၄ နာရီအတွင်း ကြည့်ရှုသူ 1M ကျော်ရှိခဲ့တယ်လို့ သိရပါတယ်။
ဒီရုပ်ရှင်တိုကို ကြည့်ရှုပြီး “ကိုယ်ချင်းစာစိတ်ဆိုတာ ကိုယ်ဖြစ်မှ နာရမယ့်အရာမဟုတ်ဘဲ သူများနေရာမှာ ကိုယ်ဆိုတဲ့စိတ်နဲ့ ဝင်ခံစားပေးတာဖြစ်တယ်၊ လက် တွေ့ဘဝပေးဆပ်နေကြရတာတွေကို တကယ်ထိထိမိမိခံစားမိစေတာပဲ၊ တချိန်က မောင်လေးအတွက် ခံစားရဖူးတဲ့ ဒီခံစားချက်၊ ရင်ထဲကခံစားချက်နဲ့ တထပ်တည်းပါလား”စတဲ့ ပြည်သူတွေရဲ့ မှတ်ချက်တွေကိုလည်း တွေ့ရပါတယ်။
ရုပ်ရှင်တိုကြော်ငြာရဲ့ အဆုံးမှာ “နင့်စာထဲမှာရေးလို့ထားတာ စိတ်မပူပါနဲ့တဲ့ . . . ၊ ပြန်ရောက်လာတဲ့အခါ ကံ့ကော်ပန်းတွေ ခေါင်းမှာ ပန်ပေးမတဲ့၊ မငိုနဲ့တဲ့” ဆိုတဲ့ စာသားတွေ ပါဝင်တဲ့ “မငိုနဲ့တဲ့” သီချင်းကလည်း မေ ၁၇ ရက်မှာ ထွက်ရှိခဲ့ပါတယ်။
“မငိုနဲ့တဲ့” သီချင်းကို တော်လှန်အနုပညာရှင် ဖြူဖြူကျော်သိန်း ကိုယ်တိုင်ရေးစပ်သီဆိုထားတာဖြစ်ပြီး Short Film ကိုတော့ ဖြူဖြူကျော်သိန်းရဲ့ ဖေ့ဘုတ်စာမျက်နှာနဲ့ ယူကျုချန်နယ်တို့မှာ တပြိုင်တည်း ထုတ်လွှင့်ခဲ့တာဖြစ်ပါတယ်။
