မွန်ပြည်နယ်၊ သထုံမြို့နယ် အတွင်းရှိ ကျေးရွာများကို အကြမ်းဖက် စစ်တပ်က လက်နက်ကြီးများဖြင့် ပစ်ခတ်ခြင်းကြောင့် နေအိမ်များ ပျက်စီးပြီး အိမ်မွေးတိရစ္ဆာန်များ သေဆုံးခဲ့ကြောင်း KNU ဗဟို က ထုတ်ပြန်ထားပါသည်။
မေလ ၁၄ ရက်နေ့ မွန်းလွဲ ၂ နာရီ ၄၀ မိနစ်ခန့်တွင် အကြမ်းဖက် စစ်တပ်၏ ခမရ-၉ တပ်ရင်း က ရွှေရောင်ပြရွာနှင့် မရမ်းကုန်းရွာ ကို လက်နက်ကြီး ၂ လုံးပစ်ခတ်ခဲ့ရာ မရမ်းကုန်းရွာမှ ဦးဖိုးဒင်၊ နော်နန္ဒာလှိုင်၊ ဒေါ်မစံနှင့် ဒေါ်မိုးကြည်တို့၏ နေအိမ်တို့ ထိခိုက် ပျက်စီးခဲ့ကြောင်း သိရသည်။
ယင်းနေ့ နံနက် ၉ နာရီ ၄၅ မိနစ်ခန့်မှ နံနက် ၁၁ နာရီ ၅၀ မိနစ်ခန့် အထိ အမတ-၃၁၄ တပ်ရင်းက လက်နက်ကြီး ၄ လုံး၊ ခမရ-၉ တပ်ရင်းက လက်နက်ကြီး ၃ လုံးနှင့် နံနက် ၁၀ နာရီခန့်တွင် ခမရ-၉ တပ်ရင်း က လက်နက်ကြီး ၄ လုံး၊ ခမရ-၉ လက်အောက်ခံ ဝီယော်စခန်းက လက်နက်ကြီး ၂ လုံး၊ ခမရ-၉ က လက်နက်ကြီး ၄ လုံး ၊ ခမရ-၉ လက်အောက်ခံ ဝီယော်စခန်းက လက်နက်ကြီး ၂ လုံး၊ မွန်းလွဲ ၁ နာရီ ၃၀ မိနစ်ခန့်တွင် အမတ-၃၁၄ တပ်နှင့် ခလရ-၈ တပ်၊ ဘီးလင်းတိုးဂိတ်စခန်းတို့က လက်နက်ကြီး ၃ လုံး ၊ အမတ-၃၁၄ တပ်ရင်းက လက်နက်ကြီး ၁ လုံး၊ ခလရ-၈ တပ်ရင်းက လက်နက်ကြီး ၁ လုံး၊ ဘီးလင်းတိုးဂိတ်စခန်းက လက်နက်ကြီး ၁ လုံး ပစ်ခတ်ခဲ့ကြောင်း သိရှိရသည်။
အလားတူ မေလ ၈ ရက်နေ့ ည ၉ နာရီ ၄၄ မိနစ်ခန့်တွင် အကြမ်းဖက် စစ်တပ်၏ ခမရ-၉ တပ်စခန်းက သထုံမြို့နယ် အတွင်းရှိ ကျေးရွာများကို လက်နက်ကြီးများဖြင့် ပစ်ခတ်ခြင်းကြောင့် မိချောင်းအိုင်ကျေးရွာ အနီး လက်နက်ကြီး ၁ လုံး ကျရောက်ပေါက်ကွဲပြီး မိချောင်းအိုင်ရွာမှ ကျွဲ ၁ ကောင်းသေဆုံးခဲ့ကြောင်း သိရသည်။
