တန့်ဆည်မြို့နယ်၊ ရွာသစ်ရွာ ဘုန်းကြီးကျောင်းတွင် တပ်စွဲထားသော စစ်ကောင်စီ တပ်သားများကို ဒရုန်းဖြင့် ဗုံးကျဲ တိုက်ခိုက်မှု ၆ ဦး သေဆုံး

စစ်ကိုင်းတိုင်း၊ တန့်ဆည်မြို့နယ်၊ ရွာသစ်ရွာ ဘုန်းကြီးကျောင်းတွင် တပ်စွဲထားသော အကြမ်းဖက် စစ်ကောင်စီ တပ်သားများကို ဒရုန်းဖြင့် ဗုံးကျဲ တိုက်ခိုက်ရာ ၆ ဦး သေဆုံးခဲ့ကြောင်း Infinity Group မှ တာဝန်ရှိသူ တစ်ဦးက ပြောဆိုသည်။

မေလ ၃၁ ရက်နေ့ ည​နေပိုင်းတွင် တန့်ဆည်မြို့ အ​နောက်ဘက် ၁ မိုင်ခန့် အကွာရှိ ရွာသစ်​(ဝါးရငယ်)ကျေးရွာ ဘုန်းကြီး​ကျောင်းတွင် တပ်စွဲထား​သော အကြမ်းဖက် စစ်​တပ်နှင့် ပျူ​စောထီး ပူး​ပေါင်းစစ်​ကြောင်းကို တော်လှန်ရေး တပ်ဖွဲ့များက ဒရုန်းဖြင့် ဗုံးသီး ၆ လုံး ကျဲချတိုက်ခိုက်ရာ ပျူစောထီး ​ခေါင်း​ဆောင် ညွန့်ခိုင် ​အပါအဝင် စစ်ကောင်စီ တပ်သား ၆ ဦး သေဆုံးခဲ့ကြောင်း သိရှိရသည်။

သေဆုံးသွားသော ပျူ​စောထီး ​ခေါင်း​ဆောင် ညွန့်ခိုင်သည် တန့်ဆည်မြို့နယ် ကာ​ပေါင်းကျရွာသားဖြစ်​ပြီး ၂၀၂၁ ခုနှစ် အ​စောပိုင်းကာလတွင် အကြမ်းဖက် စစ်​ကောင်စီထံ သတင်း​ပေး ဒလန်လုပ်ကာ ​​ကျေးရွာမှ ထွက်​ပြေးတိမ်း​ရှောင်ပြီး ကန့်ဘလူမြို့နယ် ပျူ​စောထီး ​ခေါင်း​ဆောင် ဝါသဝနှင့် ပူး​ပေါင်း၍ တန့်ဆည်မြို့နယ် အရှေ့ခြမ်း မူးမြစ်ကမ်း​ဘေး​ ကျေးရွာများကို ပျူ​စောထီး အင်အား တောင့်တင်းလာစေရန် စည်းရုံးလုပ်ဆောင်နေသူ ဖြစ်ကြောင်း သိရှိရသည်။

ပျူ​စောထီး​ ခေါင်း​ဆောင် ညွန့်ခိုင်သည် တန့်ဆည်မြို့နယ်နှင့်ကန့်ဘလူမြို့နယ် အစပ် ကဘဲ​ကျေးရွာ၌ အ​ခြေချကာ အကြမ်းဖက် စစ်တပ်၏ နယ်​မြေ ရှင်းလင်း​ရေး စစ်​ကြောင်းနှင့်အတူ လိုက်ပါ​လေ့ရှိပြီး နေအိမ်များကို မီးရှို့ခြင်း၊ စစ်​ရှောင်ပြည်သူများကို ဖမ်းဆီးသတ်ဖြတ်ခြင်း၊ ပစ္စည်းလုယက်ခြင်းများ ကျူးလွန်လျက်ရှိသူ ဖြစ်ကြောင်း Infinity Group မှ တာဝန်ရှိသူ တစ်ဦးက တာဝန်ရှိသူ တစ်ဦးက ရှင်းပြသည်။

အဆိုပါ တိုက်ခိုက်မှုကို PEER TO PEER-P2P ဒရုန်းအဖွဲ့၊ PRS LDF နှင့် ​​တန့်ဆည်မြို့နယ် အ​ခြေစိုက် ​ရွှေဘိုခရိုင်တပ်ရင်း(၁၀)တို့က ပူး​ပေါင်း လုပ်ဆောင်ခဲ့ခြင်းဖြစ်ကြောင်း သိရသည်။