ရှမ်းပြည်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ၊ ရွာငံမြို့မှာ ဇွန်လ ၁၇၊ ၁၈ ရက်နေ့ကတည်းက PDF ထောက်ပို့ဆိုပြီး စွပ်စွဲဖမ်းဆီးခံရတဲ့ အရပ်သား ၈ ဦး မိသားစုဝင်တွေနဲ့ အဆက်အသွယ်မရသေးဘူးလို့ နီးစပ်သူတွေက ပြောပါတယ်။
ပျူစောထီးခေါင်းဆောင် ဖိုးလုံးနဲ့ စျေးတန်းရပ်ကွက်အုပ်ချုပ်ရေးမှူး ဖိုးလခုံတို့ရဲ့ တိုင်ကြားချက်အရ စျေးတန်းနဲ့ ရွာမရပ်ကွက်တို့က အမျိုးသမီး ၆ ဦးနဲ့ အမျိုးသား ၄ ဦးကို ဖမ်းဆီးခဲ့တာဖြစ်တယ်လို့ သိရပါတယ်။
“ပျူခေါင်းဆောင် ဖိုးလုံးရဲ့တူမနဲ့ ဖိုးဆက်တို့လင်မယားချင်း ရန်ဖြစ်ကြတာ။ အဲ့လိုရန်ဖြစ်တော့ ဖိုးလုံးက ဖိုးဆက်တို့မိသားစုကို PDF ထောက်ပို့တယ်ဆိုပြီး တိုင်လိုက်တယ်။ အဖမ်းခံရတာက ဖိုးဆက်နဲ့ သူ့အမေ၊ သူ့ဦးလေးလင်မယားနဲ့ သူ့ညီမပါ ဖမ်းခံထားရတာ။ ပြီးတော့ ဖိုးဆက်နဲ့ ဆွေမျိုးတော်တဲ့ စုလဲ့မွန်တို့ လင်မယား။ နောက်တော့ ဖိုးလုံးရဲ့ ပုဂ္ဂိုလ်ရေးမကျေနပ်ချက်တွေနဲ့ ဆိုင်ပိုင်ရှင် မပွင့်ဖြူတို့ မောင်နှမ ၃ ယောက်လုံး” လို့ ဖမ်းဆီးခံရသူတွေတွေနဲ့ နီးစပ်သူတစ်ဦးက ပြောပါတယ်။
ဖမ်းဆီးခံထားရသူတွေထဲက ဖိုးဆက်ရဲ့မိခင်နဲ့ ညီမဖြစ်သူ ၂ ဦးဟာ မနေ့ ဇွန် ၁၉ မှာ ပြန်လွတ်လာခဲ့ပေမယ့် ကျန်တဲ့ ၈ ဦးကတော့ တောင်ကြီးမြို့ အရှေ့ပိုင်းတိုင်းစစ်ဌာနချုပ် (ရပခ) စစ်ကြောရေးစခန်းမှာ စစ်ဆေးခံနေရပြီး မိသားစုဝင်တွေကို တွေ့ခွင့်မပေးသေးဘူးလို့ သိရပါတယ်။
ဖမ်းဆီးခံထားရတဲ့ ၈ ဦးဟာ PDF နဲ့ မပတ်သက်ဘူးလို့ ရွာခံတွေက အတည်ပြုပြောဆိုထားပေမယ့် ရပခ စစ်ကြောရေးစခန်းမှာ စစ်ဆေးခံရသူတိုင်း ညှင်းပန်းနှိပ်စက်ခံခဲ့ရတာကြောင့် မိသားစုဝင်တွေက စိုးရိမ်ပူပန်နေကြတယ်လို့ ဆိုပါတယ်။
ပျူစောထီးခေါင်းဆောင် ဖိုးလုံးဟာ ရွာငံမြို့နယ် အထွေထွေအုပ်ချုပ်ရေးမှူးရုံးမှာပဲ နေထိုင်ပြီး PDF သတင်းတွေကို စစ်ကောင်စီတပ်တွေဆီ တိုင်ကြားနေတဲ့အပြင် စစ်ကောင်စီတပ်ရဲ့ ခွင့်ပြုချက်နဲ့ မူးယစ်ဆေးဝါး ရောင်းချနေသူလည်း ဖြစ်ပါတယ်။
ဒါ့အပြင် အုပ်ချုပ်ရေးမှူး ဖိုးလခုံဟာလည်း စစ်မှုထမ်းစရိတ်နဲ့ စစ်မှုထမ်းလူစာရင်းအတွက် တစ်အိမ်တက်ဆင်း ကောက်ခံနေသူ ဖြစ်ပြီး သူတို့ ၂ ဦးရဲ့ တိုင်ကြားချက်တွေကြောင့် PDF အများစု အဖမ်းခံခဲ့ရဖူးတယ်လို့ စုံစမ်း သိရပါတယ်။
