“CDMတစ်ဦးနွေဦးထီတစ်စောင်ထောက်ပို့” ကမ်ပိန်းမှာ ပြည်သူတွေပူးပေါင်း ပါဝင်ပေးကြဖို့ CDMတစ်ဦးနွေဦးထီတစ်စောင်ထောက်ပို့ Campaing ဖြစ်မြောက်ရေးအဖွဲ့ကဖိတ်ခေါ်လိုက်ပါတယ်။
ပြည်သူဝန်ထမ်း CDM သူရဲကောင်းများဟာ နွေဦးတော်လှန်ရေးမှာ အခုအချိန်အထိ စိတ်ဓာတ် ခိုင်ခိုင်မာမာ ဇွဲသန်သန်နဲ့ တော်လှန်နေကြပြီး တော်လှန်ရေးရဲ့ အဓိကဒေါက်တိုင် တစ်ခု အဖြစ် ရှိနေကြပါတယ်။
” ဒီသူရဲကောင်းတွေကို ကျွန်တော်တို့ ပြည်သူလူထု အနေနဲ့ “CDM သူရဲကောင်း တွေကို ပြည်သူ့ရင်ထဲမှာ အမြဲတမ်း ရှိပါတယ်” ဆိုတဲ့ message ကို ပေးနိုင်ဖို့ အဓိက ရည်ရွယ်ပြီး နွေဦးထီ တစ်စောင်စီကို CDM တစ်ဦးစီ ထံသို့ လက်ဆောင်အဖြစ် ထောက်ပို့ဖို့ ဖြစ်ပါတယ်”လို့ ကမ်းပိန်း ဖြစ်မြောက်ရေးအဖွဲ့က ဆိုပါတယ်
“CDM တစ်ဦး နွေဦးထီတစ်စောင် ထောက်ပို့” ကမ်ပိန်းက ရရှိနိုင်မယ့် အကျိုးကျေးဇူးတွေက နွေဦးထီ ၁ စောင်ရဲ့တန်ဖိုးက မြန်မာငွေ ၂၀၀၀ ကျပ်သာ ရှိပေမဲ့ ကမ်ပိန်းက ပေးမဲ့ လက်ဆောင် Postcard လေးက လက်ခံရရှိသူ CDM အတွက် တန်ဖိုးမဖြတ်နိုင်တဲ့ စိတ်ခွန်အားကို ဖြစ်စေမှာ ဖြစ်ပြီးတော့ လက်ဆောင်နွေဦးထီကနေ CDM တွေ ကံထူးခဲ့ရင်လည်း ကာယကံရှင်အတွက် ဝန်ထမ်းလစာ မရနိုင်သေးတဲ့ ဒီတော်လှန်ရေးကာလအတွင်းမှာ အတိုင်းအတာတစ်ခုအထိ အဆင် ပြေနိုင်တဲ့အထောက်အပံ့တစ်ခု ရရှိနိုင်မှာ ဖြစ်ပါတယ်လို့ဆိုပါတယ်။
ဒီကမ်ပိန်းကCDM အပြင် တော်လှန်ရေးအတွက်ရနိုင်တဲ့အကျိုးကျေးဇူးတွေကတော့ နွေဦးထီ ရောင်းချခြင်းက ရရှိတဲ့ငွေကို နွေဦးထီ ဆုငွေချီးမြှင့်သည့် % မှအပ ကျန် %ကို CDM များအတွက် အရေးပေါ် ငွေကြေးထောက်ပံ့မှု မှာအသုံးပြုမှာဖြစ်တဲ့အတွက် ဒီကမ်ပိန်းမှာ ပါဝင်ပြီး နွေဦးထီ ဝယ်ယူအားပေးခြင်းဟာ ပြည်သူ့ဝန်ထမ်း CDM တွေကို သွယ်ဝိုက်တဲ့နည်းနဲ့ရော တိုက်ရိုက်ကျတဲ့ နည်းနဲ့ရော အထောက်အကူဖြစ်စေဖို့ အသုံးချတာ ဖြစ်လို့ ဒီကမ်ပိန်းမှာ ပါဝင်ခြင်းဟာ တော်လှန်ရေး အတွက် အကျိုးကျေးဇူး များစေပါတယ်လို့ဆိုပါတယ်။
ကမ်ပိန်းဖြစ်မြောက်ရေးအဖွဲ့မှ CDM Success Committee မှာ အမည်စာရင်းဝင်ပြီးတဲ့ CDMer များထံကို လက်ဝယ်အရောက် ဖြန်ဖြူးပို့ဆောင်ပေးမှာ ဖြစ်တယ်လို့ သိရပါတယ်။
“CDMတစ်ဦးနွေဦးထီတစ်စောင်ထောက်ပို့” ကမ်ပိန်းမှာ ပါဝင်လိုသူတွေအနေနဲ့ ကမ်ပိန်းရဲ့လူမှုကွန်ယက်စာမျက်နှာဖြစ်တဲ့ https://www.facebook.com/cdmspringlotterysupport?mibextid=ZbWKwL မှာ ဆက်သွယ်ထောက်ပို့နိုင်ပါတယ်။
