ကရင်အမျိုးသားအစည်းအရုံး(KNU) ဖာပွန်ခရိုင် တပ်မဟာ(၅)နယ်မြေတွင် အောက်တိုဘာလအတွင်း တိုက်ပွဲပေါင်း ၈၇ ကြိမ်ဖြစ်ပွားခဲ့ပြီး စစ်ကောင်စီတပ်ဖွဲ့ဝင် ၃၀ဦးကျော်သေဆုံးခဲ့ကြောင်း KNU တပ်မဟာ(၅)က သတင်းထုတ်ပြန်သည်။
အောက်တိုဘာ ၁ရက်မှ ၃၁ရက်နေ့အထိ တိုက်ပွဲဖြစ်ပွားမှုနှင့် စစ်ကောင်စီက ပြည်သူလူထုများအပေါ် လူ့အခွင့်အရေးချိုးဖောက်မှု အခြေအနေတို့ကို အသိပေး ထုတ်ပြန်လာခြင်းဖြစ်သည်။
တိုက်ပွဲ ၈၇ ကြိမ်ဖြစ်ပွားခဲ့ရာ စစ်ကောင်စီနှင့် နယ်ခြားစောင့်တပ်ဖွဲ့(BGF) ဘက်က ၃၁ဦး သေဆုံးကာ ၅၁ဦး ဒဏ်ရာရခဲ့ကြောင်း အသိပေးသည်။
ရင်ဆိုင်တိုက်ပွဲများအတွင်း ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၅)ဘက်က ၄ဦး ကျဆုံးကာ ၆ဦး ဒဏ်ရာရခဲ့သည်ဟု ထုတ်ပြန်သည်။
စစ်ကောင်စီတပ်၏ လေကြောင်း တိုက်ခိုက်မှု လက်နက်ကြီး ပစ်ခတ်မှုများကြောင့် ရွာသား တစ်ဦး ဒဏ်ရာရခဲ့ကြောင်း လည်းဖော်ပြသည်။
စစ်ကောင်စီတပ်သည် ရပ်ရွာအတွင်းသို့ လက်နက်ကြီး ပစ်ခတ်မှုများ ရည်ရွယ်ချက် ရှိရှိ လုပ်ဆောင်နေ၍ ပြည်သူလူထု ထိခိုက်မှုများအပြင် အိုးအိမ်ပျက်စီးဆုံးရှုံးမှုများလည်း ဖြစ်ပေါ်နေရသည်ဟု KNUက အသိပေးထားသည်။
