အမျိုးသားညီညွတ်ရေးအစိုးရ NUGနဲ့ ပူးပေါင်းပြီး နွေဦးတော်လှန်ရေးမှာ အာဏာသိမ်း စစ်ကောင်စီကို ပြန်လည်တိုက်ခိုက်နေပြီဖြစ်တယ်လို့ ကရင်နီပြည်လူမျိုးပေါင်းစုံ ပြည်သူ့ လွတ်မြောက်ရေးတပ်ဦး(ကလလတ) KNPLF က ဒီနေ့ရက်စွဲနဲ့ ကြေညာခဲ့ပါတယ်။
အရင်ကထောက်ထားရတဲ့ အကြောင်းအရာတချို့ကြောင့် တစိတ်တပိုင်း လျှို့ဝှက်ဖုံးကွယ်ကာ ဆောင်ရွက်ခဲ့ရတဲ့ နွေဦးတော်လှန်ရေးဆိုင်ရာ လုပ်ငန်းတွေကို တရားဝင်အတိအလင်းဆောင်ရွက် သွားတော့မှာဖြစ်တယ်လို့ အသိပေးလာတာပါ။
လက်ရှိမှာတော့ စစ်အုပ်စုကို တော်လှန်ရေး အင်အားစုအသီးသီးက ခုခံတော်လှန်တိုက်ပွဲ ဝင်နေကြသလို KNPLF အနေနဲ့လည်း ကရင်နီစစ်မျက်နှာကနေ ပြတ်ပြတ်သားသားတိုက်ခိုက် သွားမှာဖြစ်တယ်လို့ ပြောဆိုလာတာဖြစ်ပါတယ်။
စစ်တပ်အာဏာသိမ်းချိန်ကစပြီး KNPLF တပ်တွေဟာ နေရာမျိုးစုံ၊အနေအထားမျိုးစုံကနေ အတိအလင်းနဲ့ သိုသိုသိပ်သိပ် တက်နိုင်နဲ့ နည်းလမ်းတွေနဲ့ ပါဝင်ကူညီခဲ့တယ်လို့ ထုတ်ပြန်ချက် မှာဖော်ပြထားပါတယ်။
ပြီးခဲ့တဲ့ ဇွန်လ(၁၄) ရက်နေ့က စစ်ကောင်စီ BGF ယူနီဖောင်းကိုစွန့်ပယ်ပြီး KNPLF ယူနီဖောင်း ကိုပြန်လည်ဝတ်ဆင်ကာ တခြားတော်လှန်ရေးအင်အားစုတွေဖြစ်တဲ့ KNDF၊KA ပူးပေါင်းတပ် တွေနဲ့ စစ်ကောင်စီရဲ့ မယ်စဲ့ရဲစခန်း၊ဗျူဟာကုန်းနဲ့ နယ်စပ်တပ်စခန်းတွေ ကိုသိမ်းပိုက်ပြီး တော်လှန်ရေးမှာပါဝင်လာတာဖြစ်ပါတယ်။
KNPLF တပ်ဖွဲ့ဟာ လွန်ခဲ့တဲ့ ၁၉၉၄ ခုနှစ် မေလအစောပိုင်းက (န.အ.ဖ) စစ်အစိုးရနဲ့ အပစ်ရပ် ပြီးနောက် စစ်တပ်ရဲ့ နယ်ခြားစောင့်တပ်ဖွဲ့(BGF) အဖြစ်အသွင်ပြောင်းခံခဲ့ရတာဖြစ်တယ်လို့ သိရပါတယ်။
